فى هذه الأيام العصيبة التى تمر بها البلاد قرر الكاتب هانى العنبرى التنحى قليلاً عن الكتابة فى السياسة وأحوال البلاد التى لا تسر عدو ولا حبيب ويريد ان يرسم ضحكة أو بسمة على وجوهكم من خلال السطور القادمة ، اذ يرجو أن تنال رضاكم وتحوز على اعجابكم
- مرة واحد اتجوز واحدة حلوة أوى وكان مخبى عليها أنه بيشرب سجاير وفى ليلة الدخلة قعدت قدام التسريحة وقلعت البروكة قالها ايه ده ؟! قالتله دى البروكة يا حبيبى فى حاجه ؟ قالها لأ مفيش .. وبعدين قلعت العدسات قالها ايه ده ؟!قالتله دى لانسز يا حبيبى فى حاجه ؟ قالها لأ مفيش .. وبعدين خلعت طقم السنان قالها ايه ده ؟! قالتله ده طقم السنان يا حبيبى فى حاجه ؟ الراجل قال بس أنا ادبست
قام مطلع علبة السجاير وقال مبدهاش بقى وراح مولع سيجارة
قالتله ايييييه ده أنت بتترب تتاير ؟؟!!
قالها أيييييييووووووووه تتاير وحتيت كمان .
- واحد لسه متجوز جديد نايم جنب مراته فبتقوله بردانه
قالها اتغطى كويس..
قالتله يا راجل لسه بردانه
قالها اتغطى كويس أوى..
قالتله يا راجل بقولك بردانه
قالها اتغطى كويس أوى أوى..
قالتله أنا لما كنت عند ماما بقولها بردانه كانت بتحضنى
قالها أهو ده اللى ناقص أجيب أمك تنام وسطينا !!
- مرة واحد عنده 90 سنه اتجوز واحده عندها 80 سنه ..
اول يوم جواز دخل الحمام اخد شاور ولبس البيجاما الحرير دخلت العروسة اخدت شاور ولبست قميص النوم واتقابلوا في الصاله مسك ايدها وباسها وكل واحد راح غرفته ونام ..
تاني ليلة دخل الحمام اخد شاور ولبس البيجاما الحرير ودخلت عروسته الحمام اخدت شاور ولبست قميص النوم اتقابلوا في الصاله مسك ايدها وباسها وراح كل واحد على غرفته ونام..
تالت ليله دخل الحمام اخد شاور ولبس البيجاما الحرير واخدت عروسته شاور ولبست قميص النوم واتقابلوا في الصاله لسه بيمسك ايدها علشان يبوسها قالت له : بلاش الليله انا تعبانه!
- عريس بيقول لعروسته فى أول يوم جواز عشان تبقى عامله حسابك لازم نتفق أن كلمتى فى البيت زى الساعة
قامت بصتله بصه كلها شر وغل وبرررأتله.. قالها يعنى لا بتقدم ولا بتأخر
- واحدة بتقول لجارتها أخبار جوزك ايه ؟
قالتلها راح يجيب بطاطس ضربته عربيه ومات .. قالتلها وعملتى ايه ؟
قالتلها اتصرفت وعملت فاصوليا
- واحد بيعاتب صاحبه بيقوله بأه يا راجل اعدى عليك امبارح وانت بتبوس مراتك فى البلكونه وأقولك سلامو عليكو ما تردش
قاله والله العظيم ما كنت انا
- واحد راح بيت مشبوه وكانت أول مره وقال يجرب لقى مراته جوه قال الحمد لله ربنا رايدلى الحلال !!
- طريقة الزوجات وجوزها نازل الشغل
اللبنانية: ترجع لى بالسلامه حبيبى
السورية: دخيلك ما تتأخر
المصرية : خد كيس الزبالة فى ايدك وانت نازل
- واحد بيسأل صاحبه إنتهت الخناقة بينك وبين مراتك على ايه ؟؟
قاله : جت لحد عندى راكعة على ركبها وقالتلى : اطلع من تحت السرير يا جبان !!
- أحست إحدى الزوجات بأن أجلها قد أوشك .. قالت لزوجها: حبيبى .. أنت أخلصتلى طوال حياتك .. ومفكرتش يوم تخونى .. عشان كده أوصيت لك بكل ثروتي.. ولكن عايزه منك وعد بأنك إذا اتجوزت بعد وفاتي .. متسمحش لمراتك تلبس هدومى .
فقال لها زوجها: اطمنى يا حبيبتى .. هدومك مش على مقاسها
ليست هناك تعليقات:
إرسال تعليق